தமிழ்ச்சங்கமம்: துணை ஆயுதக் குழுக்கள்

எதிரொலி

எதிரொளி

முன்னைய பதிவுகள்

தொகுப்பு

உங்கள் வரவுகள்

நன்றிகள்

»--------»

துணை ஆயுதக் குழுக்கள்

கிழக்கில் துணை ஆயுதக் குழுக்கள் செயற்படுகின்றன. இந்த துணை ஆயுதக் குழுவொன்றை நாம் வாழைச்சேனையில் சந்திக்க நேர்ந்தது . கிழக்கில் துணை ஆயுதக் குழு இல்லை என்ற அரசாங்கத்தின் கூற்று தவறானது என்று யுத்த நிறுத்தக் கண்காணிப்புக் குழுவின் முன்னாள் தலைவர் ஹப்ரூக் ஹொக்லண்ட் தெரிவித்துள்ளார்.

விடுதலைப் புலிகளே போர் நிறுத்த உடன்படிக்கையை அதிகளவு மீறியுள்ளதாக தரவுகள் புள்ளிவிபரங்கள் எடுத்துக் காட்டுகின்ற போதிலும் கிழக்கில் அரசாங்க கட்டுப்பாட்டுப் பகுதியிலேயே அதிகளவு அரசியல் படுகொலைகள் இடம்பெறுகின்றன என்றும் அவர் கூறியுள்ளார். நேரடிப் பேச்சுக்களின் மூலமும் இரு தரப்பிற்கும் இடையில் புரிந்துணர்வையும் விட்டுக்கொடுப்பையும் கட்டியெழுப்புவதன் மூலமுமே பிரச்சினைக்கு சுமுகமான தீர்வு காணமுடியும் என்றும் அவர் நம்பிக்கை வெளியிட்டுள்ளார். யுத்த நிறுத்த கண்காணிப்புக் குழுவின் தலைவராக பதவி வகித்து ஓய்வு பெற்றுச் செல்லும் நாளில் வழங்கிய செவ்வியிலேயே ஹக்ரூப் ஹொக்லண்ட் இவ்வாறு கூறியுள்ளார்.

அந்த பேட்டியின் முழு விபரம் வருமாறு:

கேள்வி: கடந்தவாரம் கடற்படையினரின் டோறாப் படகு தாக்கப்பட்ட சம்பவம் தொடர்பான உங்களது விசாரணைகளின் பெறுபேறு என்ன?
பதில்: இது மிகவும் பாரியதொரு சம்பவமாகும். மன்னாரின் தென் பகுதியில் இருந்து ஏறத்தாழ 17 கடல் மைல் தொலைவில் இச்சம்பவம் இடம் பெற்றுள்ளது. அவ்விடத்தில் எமது அதிகாரிகள் எவரும் அச்சமயம் இருக்கவில்லை. நாம் இலங்கைக் கடற்படையிடம் விசாரணை மேற்கொண்டு தகவல்களை பெற்றுள்ளோம். எப்படி இருப்பினும் இது மிக மிக ஆபத்தானது.

கேள்வி: யதார்த்த பூர்வமாக பேசினால் விடுதலைப் புலிகள் தவிர்ந்த வேறொரு அமைப்பினால் வெடிபொருட்களுடன் கூடிய இழுவைப்படகுகள் கடலில் பயணம் செய்து கடற்படையின் டோறா படகை வெடிக்க வைக்க முடியுமென நீங்கள் கருதுகின்றீர்களா?
பதில்: இச்சம்பவத்தின் பின்னணியில் விடுதலைப் புலிகள் உள்ளார்கள் என்று கூறப்படுவதன் சாத்தியம் தொடர்பாக நாம் தீவிரமாக ஆராயந்து வருகிறோம். எனினும் அதில் மூன்றாவது தரப்பொன்றிற்கும் சம்பந்தம் உள்ளதா என்பது தொடர்பாகவும் விசாரணை செய்ய வேண்டிய தேவையும் உள்ளது.

கேள்வி: கடந்த காலத்தில் கிழக்கில் இடம் பெற்ற பல படுகொலைகள் தொடர்பாக மூன்றாம் தரப்பொன்றின் மீது கடுமையாக குற்றஞ்சாட்டப்பட்டது. தற்போது இச்சம்பவம் தொடர்பாகவும் அவ்வாறே குற்றம்சாட்டப்படுகிறது. எனவே இச்சம்பவங்களுக்கும் மூன்றாம் தரப்பொன்றிற்கும் சம்பந்தமுள்ளதை உண்மையாகவே நீங்கள் நம்புகிறீர்களா?

பதில்: இவ்விடயம் குறித்து கலந்துரையாட முடியாது. ஏனெனில் இதே போன்றதொரு கருத்தையே தென்பகுதியில் உள்ளவர்களும் வெளிப்படுத்தி வருகின்றனர். ஆனால் கிழக்கில் நடைபெற்ற சகல படுகொலைகளுடனும் அம் மூன்றாந் தரப்பிற்கு தொடர்பு உண்டு. ஆனால் கடந்த வாரம் கடலில் இடம்பெற்ற சம்பவம் தொடர்பாக ஆராய்கின்றபோது பல விடயங்களை நாம் மறந்து விடக்கூடாது. இலங்கையின் வடமேற்கு கடற்பரப்பு, இலங்கை இந்தியாவிற்கிடையில் உள்ளது. இப்பிரதேசத்தில் மீன்பிடி, சாதாரண கடற்பயணங்கள் என்பவற்றைவிட போதைப் பொருள் கடத்தல் மற்றும் பல சட்ட விரோதச் செயன் முறைகளும் இடம் பெற்று வருகின்றன. ஆகவே இத்தாக்குதல் சம்பவத்துடன் போதைப் பொருள் கடத்தல்காரர்களுக்கு தொடர்பு உண்டு என நான் கூறவில்லை. ஆனால் அக்கடற்பிரதேசத்தில் உள்ள குற்றவாளிகளின் செயற்பாடுகளையும் மறந்துவிட முடியாது.

கேள்வி: ஆனால் போதைப் பொருள் கடத்தற்காரர்கள் வெடி பொருட்கள் அடங்கிய இழுவைப் படகை செலுத்துவதுண்டா?
பதில்: நான் அவ்வாறு கருத்துத் தெரிவிக்கவில்லை. ஆனால் நீர் இவ்விடயத்தை ஆழமாக துருவிக் கொண்டு இருக்கின்றீர். நான் முறைப்பாடுகளை எதிர்க்கவோ, அல்லது எதிராக செயற்படவோ இல்லை. இவ்விடயத்தில் மேலும் கருத்துக் கூற நான் விரும்பவில்லை. அத்துடன் இந்த வகையான போக்கை நான் விரும்பவில்லை.
கேள்வி: சரி. எனினும் இவ்வாறான சம்பவங்களை தடுப்பதற்கு அல்லது கட்டுப்படுத்துவதற்கு போர் நிறுத்தக் கண்காணிப்புக் குழு தவறிவிட்டதாக உங்கள் மீது ஒரு குற்றச்சாட்டு சுமத்தப்படுகின்றதல்லவா? பதில்: இதற்கு விடையளிக்க வேண்டிய தேவை எனக்கு உள்ளது. இங்கு நிலவிவருகின்ற முரண்பாட்டிற்கு அல்லது பிரச்சினைக்கு போர் நிறுத்தக் கண்காணிப்புக் குழு காரணமல்ல என்பது யாவருக்கும் தெரியும்.

இங்கு நிலவுகின்ற பிரச்சினைகளுக்கு காரணம் அரசாங்கமும் விடுதலைப் புலிகளுமே. இவ்விரு தரப்பினரும் போர் நிறுத்த உடன்பாட்டை முழுமையாகவும் சிறப்பாகவும் கடைப்பிடிப்பதற்கு உதவி செய்வதற்காகவே நாங்கள் இங்கு உள்ளோம். எங்களுக்கு கட்டாயப்படுத்தல் கட்டளையிடுதவதற்கான எந்தவித அதிகாரமும் இல்லை. எங்களுக்கு அவ்வாறான அதிகாரம் இருப்பின், நாம் பேசும் பாணி வேறு மாதிரியிருக்கும். இரு தரப்பிற்கும் இடையிலான இணக்கப்பாட்டை அடிப்படையாகக் கொண்டதே இப்போர் நிறுத்த ஒப்பந்தமாகும். இரு தரப்பும் இப்போர் நிறுத்தத்தை அமுல்படுத்த கண்காணிப்புக் குழுவுடன் இணைந்து செயற்பட வேண்டும். ஒரு வேளை இந்த இரு தரப்பும் எம்முடன் இணைந்து செயற்பட முன்வராவிட்டால் போர்நிறுத்த கண்காணிப்புக் குழுவின் இருப்பும், அதன் செயற்பாடுகளும் அர்த்தமற்றதாகிவிடும். இதுவே யதார்த்தமான நிலையாகும்.

கேள்வி: அப்படியாயின் போர் நிறுத்தக் கண்காணிப்புக்குழுவின் செயற்பாடுகளை உறுதிப்படுத்துவது. போர் நிறுத்த ஒப்பந்தத்தை மேலும் வலுப்படுத்துதல் தொடர்பான அடுத்த கட்டப் பேச்சுவார்த்தையின் போது போர் நிறுத்த ஒப்பந்தத்தை மேலும் வலிதாக்குவதற்கு எவ்வாறான சிபாரிசுகளை நீங்கள் முன்வைப்பீர்கள்?
பதில்: அரசாங்கமும் விடுதலைப் புலிகளும் தாம் என்ன செய்து கொண்டிருக்கிறோம் என்பதை உணர வேண்டும். இருதரப்பாலும் கைச்சாத்திடப்பட்ட ஒப்பந்தத்தை நடைமுறைப்படுத்த உடனடி நடவடிக்கை எடுக்க வேண்டும். ஆனால் இருதரப்பிற்கிடையில் போர் நிறுத்தத்தை அமுல்படுத்துவதற்கான உறுதிப்பாடு மிகக் குறைவாக ஏன் பூச்சியம் என்றே கூறலாம். இந்த நேரத்திலாவது இரு தரப்பும் இதில் தமது பொறுப்பை உணர்ந்து போர் நிறுத்தத்தில் குறிப்பிடப்பட்டவற்றை கடை பிடிக்கவும் அமுல்படுத்தவும் நடவடிக்கை எடுக்க வேண்டும்.

கேள்வி: சமாதானச் செயன்முறைகள் ஆரம்பத்தில் அதன் இலக்கை நோக்கி சென்று கொண்டிருந்தன. ஆனால் கிழக்கில் திடீரென அரசியல் கொலைகள் இடம் பெற்றன. இப்போர் நிறுத்த மீறல்கள் எவ்வாறு ஏற்படத் தொடங்கின. பதில்: கிழக்கிலுள்ள விடுதலைப் புலிகள் அமைப்பில் ஏற்பட்ட பிளவின் பின்னரே இந்நிலைமை ஏற்படத்தொடங்கியது. எனது தனிப்பட்ட கருத்தின்படி அவ்வாறான பிளவு எதுவும் ஏற்படவில்லை என்பதாகும். எப்படி இருப்பினும் சூழ்நிலைகள் முன்னரைவிட தற்போது நல்ல நிலையிலேயே உள்ளது.
கேள்வி: ஆனால் விடுதலைப் புலிகள் அமைப்பில் இருந்து கருணா பிரிவதற்கு முன்னரே கிழக்கில் பல்வேறு அரசியற் கொலைகள் இடம்பெற்றன. மாற்று தமிழ் அரசியல் இயக்க உறுப்பினர் பலர் சுட்டுக்கொல்லப்பட்டமை உங்களுக்கு ஞாபகம் இருக்கிறதா?
பதில்: தமிழீழ விடுதலைப் புலிகளின் இயக்க உறுப்பினர்கள் கொல்லப்பட்டதை நீங்கள்தான் மறந்துவிட்டீர்கள். ஏன் நீங்கள் இரு தரப்பிற்காகவும் பேச மறுக்கின்றீர்கள்?

விடுதலைப் புலிகளின் ஒவ்வொரு தவறான செயல்களுக்காகவும் அவர்களை நான் கண்டிக்க முடியாது. ஏனெனில் அரசின் தரப்பிலும் பிழைகள் உள்ளது. அங்குள்ள முக்கிய பிரச்சினை வட கிழக்கில் உள்ள தமிழ் மக்களுக்கும் இராணுவம், பொலிஸார் உள்ளிட்ட பாதுகாப்பு படையினருக்கும் இடையில் நம்பிக்கை இல்லாததாகும். ஏனெனில் இராணுவமும் பொலிஸாரும் நீதியற்று செயற்படுவதாகவே மக்கள் கருதுகின்றனர். அப்பிரதேசத்தில் காணப்படும் யதார்த்தபூர்வமான பிரச்சினை இதுதான்.

கேள்வி: அப்படியாயின் அங்குள்ள பிரச்சினைக்கு தீர்வுகண்டு நிலைமையை எவ்வாறு சுமுகமாக்குவது?
பதில்: முதலில் நேரடியாகப் பேசுவது அவசியமானது. கடந்த மாதம் ஜெனிவாவில் பேச்சுவார்த்தை நடைபெற்றது. இது தொடர் ந்து நடைபெறும் என நான் நம்புகின்றேன். போர்நிறுத்த ஒப்பந்தம் சம்பந்தமான விடயத்தை எடுத்துக்கொண்டால் இருதரப்பும் நேரடியாக சந்தித்துப் பேச்சுவார்த்தை நடத்துவதற்குரிய அடித்தளத்தை ஏற்படுத்துவதற்கு நாம் எம்மாலான உதவியினை செய்வோம். இச்சந்திப்பு அரசியல் விடயங்களை பேசுவதற்கானதல்ல. மாறாக போர்நிறுத்த ஒப்பந்தத்தை அமுல்படுத்த முனையும்போது எழுகின்ற நடைமுறை ரீதியிலான பிரச்சினைகளை பேசி தீர்வு காண்பதற்கான தளமாக இது இருக்கும். இருதரப்பிலும் மேல்மட்டத்திலும் கீழ்மட்டத்திலும் இந்நேரடிப் பேச்சுகள் அவசியமானது. இருதரப்பும் இதை நன்கு உணர்ந்துள்ளனர். எனவே இவ்விடயத்தில் நான் அவர்களுக்கு அறிவுரை கூறவேண்டிய தேவை இல்லை.
கேள்வி: போர்நிறுத்த மீறல்கள் தொடர்பாக எடுத்துக்கொண்டால் பாதுகாப்பு படையினரைவிட விடுதலைப் புலிகள் அதிகமாக போர்நிறுத்த மீறல்களில் ஈடுபட்டுள்ளதாக தரவுகள் காட்டுகின்றதே?

பதில்: இத்தரவுகளில் இருந்து உண்மைகளை உணர்ந்து கொள்வது ஒவ்வொரு தனிப்பட்டவரையும் பொறுத்தது. விடுதலைப் புலிகள் பாதுகாப்புத் தரப்பினரைவிட அதிகமான யுத்தநிறுத்த மீறலில் ஈடுபட்டிருப்பது என்ற தகவலில் எவ்வித சந்தேகமும் இல்லை. இவற்றில் பெரும்பாலான முறைப்பாடுகள், சிறுவர்களை படையில் சேர்ப்பது தொடர்பானதாகவே உள்ளது. இது மிகவும் பாரதூரமான சம்பவம். ஏனெனில் இது சட்டவிரோதமானது. சிறுவர்கள் தாமாகவே படையில் இணைகிறார்கள் என்று கூறப்படுவது ஏற்றுக்கொள்ளக்கூடியதல்ல. ஒரு நபரை கொலை செய்வது மாத்திரம் யுத்தநிறுத்த மீறலல்ல. புலிகள் தமது கொடியை ஏற்றுவதும் கூட யுத்தநிறுத்த மீறலேயாகும். எனவே சிறிய பெரிய என சகல சம்பவங்களும் யுத்த நிறுத்த மீறலாகவே கொள்ளப்படுகின்றன. எனினும் கிழக்கில் இடம்பெற்ற படுகொலைகளே பதற்றத்தையும் நிச்சயமற்ற தன்மையையும் அங்கு தோற்றுவித்ததோடு மக்களிடையே அச்சத்தையும் ஏற்படுத்தியது.

நீங்கள் ஏற்றுக்கொள்கிறீர்களோ, இல்லையோ, இப்படுகொலைகள் அனைத்தும் அரசாங்க கட்டுப்பாட்டுப் பகுதியிலேயே இடம்பெற்றுள்ளன. அரச கட்டுப்பாட்டுப் பகுதியின் பாதுகாப்பு மற்றும் சகலவற்றிற்கும் யார் பொறுப்பு? பாதுகாப்பு படைகளே. ஆனால் இது மிகவும் சிக்கலான விடயமாகும். இருதரப்பினரும் ஒன்றாக அமர்ந்து இச்சிக்கலான விடயங்களை தீர்ப்பதில் உள்ள நடைமுறைப் பிரச்சினைகளை ஆராயவேண்டும். அத்தோடு இரு தரப்பினரிடையேயும் நம்பிக்கை கட்டியெழுப்பப்பட வேண்டும். கேள்வி: இப்பிரச்சினையை தீர்ப்பதற்கு சிறந்த முறை என நீங்கள் எதனை சிபாரிசு செய்கிறீர்கள்? பதில்: நேரடியான பேச்சுவார்த்தை. கீழ்மட்டத்தில் இருந்து இருதரப்பினரிடையேயும் நேரடியான பேச்சுவார்த்தைகள். பேச்சவார்த்தை கலந்துரையாடல், பிரச்சினைகளை தீர்த்தல்.

கேள்வி: கருணாவின் பிரிவிற்கும் அவரது செயற்பாடுகளுக்கும் பாதுகாப்புப் படையினருக்கு பங்கு உள்ளது என குற்றஞ்சாட்டிய விடுதலைப் புலிகள் சில சந்தர்ப்பங்களில் பாதுகாப்பு படையினருடன் நேரடியாக சந்திப்பதை நிராகரித்துள்ளனரே?
பதில்: கடந்த 2004ஆம் ஆண்டு மார்ச் மாதம் 3ஆம் திகதி கருணாவின் பிளவு இடம்பெற்றது. அதற்குப் பிறகும்கூட இரு தரப்பினருக்குமிடையில் பல சந்திப்புக்கள் இடம்பெற்றுள்ளன. இறுதியாக கடந்த 2005ஆம் ஆண்டு ஆகஸ்ட் மாதம் யாழ். இராணுவக் கட்டளையிடும் அதிகாரிக்கும் விடுதலைப் புலிகளின் யாழ். மாவட்ட அரசியல் பிரிவு தலைவருக்குமிடையில் சந்திப்பு இடம்பெற்றது. இதற்கு பின்னரும் கீழ்மட்டத்தில் பல சந்திப்புக்கள் நடைபெற்றன. எனினும் கடந்த வருடம் டிசம்பர் மாதம் இரு தரப்பினருக்குமிடையில் நேரடிப் பேச்சுவார்த்தை ஒன்றை ஏற்படுத்தும் முயற்சியில் நாம் ஈடுபட்ட போது பாதுகாப்பு படையினரே சந்திப்பை நிராகரித்தனர்.

கேள்வி: இராணுவக் கட்டுப்பாட்டுப் பகுதியில் துணை இராணுவக் குழுக்களின் நடவடிக்கைகளை நீங்கள் கண்டுள்ளீர்களா?
பதில்: ஆம், இறுதியாக கடந்த மார்ச் 28 ஆம் திகதி அவர்களை நாங்கள் வாழைச்சேனைப் பகுதியில் பார்த்தோம். சாதாரண சிவில் உடையில் ஆயுதம் தாங்கியிருந்த அவர்களிடம் நாம் பேசினோம். அவர்களிடம் நீங்கள் யார் எனக் கேட்டதற்கு தாங்கள் கருணா குழுவினர் என அவர்கள் பதிலளித்தனர். அவர்களுக்கு யார் தலைமை தாங்கிச் செயற்படுகிறார்கள் என்பது உங்களுக்குத் தெரியும். ஆனால், இங்கு எவ்வித ஆயுதக் குழுவும் செயற்படவில்லை என தென்பகுதி அரசாங்கம் தெரிவிக்கின்றது. அது முற்றிலும் தவறானது.
கேள்வி: கருணா குழுவை துணை இராணுவக் குழு என்ற வரையறையில் அடக்கலாமா? ஏனெனில் இப்போர் நிறுத்த ஒப்பந்தம் கைச்சாத்திட்ட போதும் பேச்சுவார்த்தை நடத்தப்பட்ட போதும் விடுதலைப் புலிகள் சார்பில் கருணா பங்குபற்றினாரே?
பதில்: அதாவது கருணா குழு துணை இராணுவக் குழு அல்ல என்று கூறுவதற்கு நீர் முயற்சிக்கின்றீர். அவர்கள் துணை இராணுவக் குழு அல்ல என நான் கூற முடியாது.

ஏனெனில், துணை இராணுவக் குழு என்ற சரத்தின் கீழ் பாதுகாப்புப் படையினரின் கீழ் செயற்படுபவர்கள் பாதுகாப்புப் படையினரின் ஆதரவுடன் செயற்படும் ஆயுதக் குழு துணை இராணுவக் குழுவாகும். எனவே, கருணா குழுவை துணை இராணுவக் குழு அல்ல எனக் கூற முடியாது. அவர்கள் சில பகுதிகளில் இயங்குகிறார்கள். பாதுகாப்புப் படையினரின் உதவியுடன் செயற்படுகிறார்கள். இது அவர்களை துணை இராணுவக் குழு என கூறுவதற்கு போதுமானது. எனினும், அவர்கள் துணை இராணுவக் குழுக்களா அல்லவா என்பது பிரச்சினையல்ல. இப்போது இராணுவத் தளபதி கூறுகிறார். அரச கட்டுப் பாட்டுப் பகுதியில் எவ்வித ஆயுதக் குழுக்களும் இயங்கவில்லை என்று. ஆனால் அவரது கூற்றில் எவ்வித உண்மையுமில்லை என்பதை நான் வருத்தத்துடன் கூற விரும்புகின்றேன். ஏனெனில் ஆயுதக் குழுவினரை நாம் அரச கட்டுப்பாட்டுப் பகுதியில் கண்டு அவர்களுடன் பேசியுள்ளோம்.

கேள்வி: இராணுவத்தினரால் இக்குழுக்களிடமிருந்து ஆயுதங்களை களைய முடியும் என நீங்கள் நினைக்கிறீர்களா? பதில்: இராணுவத்தினர் ஆயுதம் தாங்கியவர்கள். எனவே, அவர்களால் இதனை கட்டுப்படுத்த முடியும். அத்தோடு இவ்விடயம் கேள்விகளுக்கு அப்பாற்பட்டது. ஏனெனில் ஒவ்வொருவரும் ஆயுதங்களை தாங்கிக் கொண்டு மக்களை கொல்வதை அனுமதிக்க முடியும் என்கிறீர்களா?

கேள்வி: இக்குழுக்களிடமிருந்து இராணுவம் ஆயுதங்களை களைவது நடைமுறைச் சாத்தியமானதா?
பதில்: அதை நீங்கள் இராணுவத் தளபதியிடம்தான் கேட்க வேண்டும். கேள்வி: நீங்கள் கடந்த நான்கு வருட காலமாக இங்கு பணியாற்றியுள்ளீர்கள். தற்போதைய நிலைமை தொடர்பான உங்கள் கருத்து என்ன?
பதில்: நாங்கள் இங்கு வந்ததற்கும், தற்போதைய நிலைமைக்கும் பாரிய வேறுபாடு உண்டு. அப்போது மக்கள் மனதில் மகிழ்ச்சி நிரம்பியிருந்தது. 2002 செப்டெம்பரில் முதற் சுற்று பேச்சுவார்த்தையும், அதனைத் தொடர்ந்து ஆறு சுற்றுப் பேச்சுவார்த்தைகளும் நடைபெற்றன. பின்னர் நிலைமை முற்றிலும் மாறியது. இப்பிரச்சினைக்கு தீர்வு காணப்படும் என நான் நம்புகின்றேன். நான் சந்தித்துப் பேசிய மக்கள் அனைவருமே தாம் சமாதானத்தை விரும்புவதாகவே தெரிவித்தனர்.
கேள்வி: கடந்த சில வாரங்களாக வன்முறைச் சம்பவங்கள் அதிகரித்து வருகின்றன. இது அடுத்த கட்ட பேச்சுவார்த்தையில் தாக்கத்தை ஏற்படுத்துமா?

பதில்: இல்லையென்றே கருதுகின்றேன். எனினும், ஆபத்தான பாரிய சம்பவங்கள் நிலைமையை மேலும் சிக்கலாக்கலாம்.
கேள்வி: போர் நிறுத்த ஒப்பந்தத்திலுள்ள சில சரத்துக்கள் சர்ச்சைக்குரியதாக உள்ளதே. உதாரணமாக உயர் பாதுகாப்பு வலயம் தற்போதைய சூழ்நிலையில் உயர்பாதுகாப்பு வலயத்தை அகற்றும் சாத்தியம் உள்ளதா?
பதில்: ஆம் என்றே நான் நிச்சயமாக சொல்வேன். ஆனால், தற்போதைய சூழ்நிலையே பிரச்சினையாக உள்ளது. இராணுவத்தினரின் பாதுகாப்பிற்காகவே உயர் பாதுகாப்பு வலயங்கள் அமைக்கப்பட்டுள்ளன என்பதை மக்கள் நன்கறிவர். ஆனால் விடுதலைப் புலிகளின் கட்டுப்பாட்டுப் பிரதேசத்திலும் உயர் பாதுகாப்பு வலயங்கள் உள்ளன. அரச கட்டுப்பாட்டில் உள்ள உயர் பாதுகாப்பு வலயம் தொடர்பாக பேசும் போது விடுதலைப் புலிகளின் கட்டுப்பாட்டுப் பகுதி தொடர்பாக கேள்விகள் எழும்புவது தவிர்க்க முடியாதது. இது போர் நிறுத்த காலம். இதிலிருந்து அதிகமாக எதிர்பார்ப்பதற்கு முற்பட்டால் அது யதார்த்தமற்றதாக அமையும். தென்பகுதியிலுள்ள பேரினவாதிகள் இவ்வாறான எதிர்பார்ப்புகளையே வெளியிடுகின்றனர். அவர்கள் விடுதலைப் புலிகளின் ஆயுதங்கள் களையப்பட வேண்டும் என கூறுகின்றனர். இது மிகவும் முட்டாள்தனமானது. ஏதோவொன்றிற்காக போராடும் ஓர் அமைப்பு, ஆயுதங்களை கைவிடும் முன்பு அது மிகவும் உறுதியான உத்தரவாதத்தை எதிர்பார்க்கும்.
கேள்வி: நான்கு வருட பணியின் பின்பு நீங்கள் ஓய்வு பெற்றுச் செல்கிறீர்கள். நீங்கள் அதிகமாக எதிர்கொண்டது சாதகமான நிலைமைகளா அல்லது பாதகமான நிலைமைகளா?

பதில்: இரண்டு நிலைமைகளும், மாறி மாறி வந்தன. கடந்த டிசம்பர், ஜனவரி மாதங்களில் போர் நிறுத்தம் முடிந்து விட்டதாகவே நான் நினைத்தேன். ஜெனிவாவில் பேச்சுக்கள் தொடர்ந்து நடைபெற்று, சாதகமான நிலைமை ஏற்படும் என நான் உறுதியாக நம்புகின்றேன்.

நன்றி: சண்டே ஒப்சேவர், தினக்குரல்

0 Comments: